الاثنين، 31 ديسمبر 2012

الريجيم المثالى للدكتور اسامة حجازى


هنلخص ليكم حلقات الريجيم المثالى للدكتور اسامة حجازى جزاه الله خيرا والتلخيص ده حصرى لينا بكل نقاطة لمدونة نص الدنيا ونبدأ

الرجيمالمثالي له تلات قواعد و ست نصائح مهمة جدا نفذتيهم يبقي ان شاء الله حتخسي و تفرحي و تستعيدي رشاقتك تاني

الثلاث قواعد:
1- لازم الرجيم يحتوي علي كل العناصر الغذائية بمعني 50% برتينات و 35 % نشويات و 15% دهون
ليه بقة؟ علشان الجسم بيحتاج العناصر مثلا نسبة الدهون دي علشان يمتص مجموعة من الفيتامينات المهمة جدا للجسم و هي فيتامين الف و دال و كاف و هاء فاذا عملت نفسك فالحة و منعت نسبة الدهون دي فان جسمك مش حيمتص الفيتامينات دي فيضعف و تبدأي تعيي و تتعبي و نفس الشئ بالنسبة للنشويات فلازم الالتزام بالمكتوب في الوجبة تمام.

2- التخفيف من الابيضين الاول السكر لانه طبعا سعرات حرارة التاني هو الملح لانه بيخزن الماء في الجسم فيزيد الوزن بدون داعي
3- شرب الماء ثم شرب الماء ثم شرب الماء حيث تشربين 2كوب ماء كبير قبل الاكل دائما ده غير الماء في الاوقات العادية بحيث اجمالي الماء المشروب في اليوم يكون من 2 الي 3 لتر ماء علي الاقل لان الماء يزيد من التمثيل الغذائي للجسم او بالبلدي يزيد نسبة حرق السعرات في الجسم.

الست نصائح:
1-الابتعاد عن كلمة التخسيس السريع لجسمك كوني رحيمة بنفسك علشان متزهقيش و تكتئبي من الحرمان و تسيبي الرجيم و ترجعي اكتر مما كنتي لانك لو فقدت 2 كيلو في الاسبوع و مرجعتهمش تاني احسن من لما تخسي 5 كيلو في الاسبوع و ترجعيهم بعد كده 10 كيلو.
2-متجربيش اي رجيم غير مدروس زي الرجيم الكيميائي و رجيم عديم الدهون و رجيم عديم النشويات لان الانواع دي من الرجيمات بتستخدم مع ناس ليها ظروف جسدية معينة مش موجودة فيكي اما رجيمنا ده مثالي واخد الامور باعتداااال شديد.3-لا تقلللي من شان الخلية الدهنية الموجودة في جسمك و تكرهيها لانها مهمة زيها زي الخلايا العصبية تمام كل اللي بنعملة اننا بنشيل الزيادة منها بس و نخاللي النسبة المفيدة علشان يكون عندك طاقة تقدري تحرقيها في حركتك اليومية و متحسيش بالخمدان او الخمول بل تكوني رشيقة و حيوية.4-يوم الراحة من الرجيم مهم جدا متقوليش انا مش حاخد راحة لان الجسم بطبيعتة ذكي و لما يعرف انه ماشي علي نظام غذائي قليل يعمل خط دفاعي لنفسه و يبدا يخزن كل الطعام اللي داخله علشان يعوض النقص فتزيدي بدل ما تخسي لكن يوم لراحة حيلخبطه و يخليه مرتبك و يبدأ يحرق اكتر علشان يهضم الطعام الجديد اللي داخله و بعدين لما نرجع لنظامنا يتلخبط تاني و يبدا يحرق بمعدلات مختلفة و هكذا دوالييك
5-مهم جدا جدا تثبيت الميزان لا ميزان عن ميزان يفرق وثبتي كمان الوقت اللي بتوزني فيه نفسك مش كل شوية توزني نفسك و تقوللي ايه ده انا مخستش؟ و يحصلك احباط و اكتئاب و ان الرجيم مش نافع ؟ لألألألألألألألألألألألأ
لازم تدي الجسم فرصة انه ينزل في الوزن في الوقت المحدد له
مثلا حددي كل يوم سبت الصبح قبل الافطار انك تقيسي نفسك و تأيدي الوزن في جدولك و تشيلي الميزان من قدام عنيكي خالص لباقي الاسبوع لحد السبت القادم و قيسي و افرحي بالنتيجة.
6- ممارسة اي نوع من الرياضة و يفضل المشي علي الاقل نصف ساعة يوميا لان الحركة بتنشط الدورة الدموية فبتزيد من حرق الدهون في الجسم و التمثيل الغذائي في الجسم او لو عندك جهز رياضي.
وانا ححطلك في اخر الموضوع اللينك ده فتوكة جميلة جابته فيه ازاي تعملي رياضة مشي في البيت من غير ما تنزلي الشارع
ملحوظة حلوة اوي
كل كيلو بتشليه من وزنك = 4 كيلو اتشالوا من الحمل علي العمود الفقري و المفاصل
فلو خسيتي 5 كيلو مثلا = 20 كيلو اتشالوا من علي عمودك الفقري و مفاصل
و اساليني انا عن تعب المفاصل و الظهر مع زيادة الوزن انا مجربها و ربنا يبعد عنكم شرها


المشروب السحري الحارق:
الوصفة دي مكونة من اعشاب مشهورة جدا كل اللي بتعملة انها بتزود نسبة الحرق للمواد الغذائية سواء اللي داخلة او موجودة فعلا في الجسم بنسبة كبيرة جدا فتخسي بيها مع الرجيم كويس جدا جدا ده غير انا بتسد النفس جدا جدا.
الوصفة تشرب قبل الوجبات الثلاثة ب نصف ساعة و حتي قبل الاكل علي طول لو نسيتي مش مشكلة و هي للامانة طعمها وحش بس اعملي زيي انا بسد مناخيري و اشرب الكباية علي بؤ واحد فمبحسش بيها خالص غير بحبه حرقان من طعم الزنجبيل بيروح في ساعتها فأوعي تكسللي و متخدهاش لانها لوحدها ممكن تخسسك 7 كيلو في مقاس لبسك بدون رجيم.

حتجيبي:
ملعقة قرفة + 2 ملعقة زنجبيل + 2 ملعقة شاي الصين الاخضر + 2 ملعقة نعناع + 2 ملعقة كمون

و تضعي المكونات دي في 3مجات مياه كبيرة و تغليهم علي النار يادوب دقيقتين و تطفي و تغطيها علشان الزيوت الطيارة متروحش منها و بعد ساعة صفيها في برطمان زجاجي و بكده يكون عندك 3 كوبيات بتوع النهاردة جاهزين للشرب قبل كل واجبة.]

الرجيم بقة زي ما حتعمليه بالضبط


ليكي 2 ملعقة سكر في اليوم وزعيهم زي ما انت عايزة علي اليوم

الافطار :
1-شرب المشروب السحري الحارق قبل الافطار ب نصف ساعة
2-شرب 1 او 2 كوب ماء كبير قبل الاكل مباشرة (و ليس بعده او اثناءه ابدا)
3-اختاري حاجة واحدة من(1 بيضة مسلوقة او 3 ملاعق فول بدون زيت او قطعة جبنة قريش او قطعة جبنه نستو او قطعة طعمية واحدة)
4-نصف رغيف عيش بلدي (ثابت معايا في الفطار)5-كوب شاي او قهوة بدون سكر.

(لازم تختاري حاجة من كل خطوة من الخمسة يعني مثلا فطارك النهردة حيكون:
شرب المشروب الحارق+الماء+بيضة مسلوقة+نصف رغيف العيش+كوب شاي بدون سكر)

الغداء:
1-شرب المشروب السحري الحارق قبل الغداء ب نصف ساعة.
2-شرب 1 او 2 كوب ماء كبير قبل الاكل مباشرة (و ليس بعده او اثناءه ابدا)
3-اختاري واحد مما يلي:
2 قطعة لحم مشوية او مسلوقة او ربع فرخة مشوية او مسلوقة او 2 سمكة مشوية او علبة تونة مصفاة من الزيت تماما او التونة اللي في محلول ملحي مصفاة بردو او 2 بيضة مسلوقة)
4-اختاري واحد مما يلي:
نصف رغيف عيش بلدي او 5 ملاعق ارز مسلوق او 5 ملاعق مكرونة مسلوقة مغسولة كويس
5-طبق سلطة كبييير علشان تشبعي و اختاري من الاتي زي ما انت عايزة مش شرط كل المكونات دي(طماطم- بقدونس- شبت - كرفس -فلفل رومي- بنجر - جزر – خيار- خس).
6-طبق خضار (مش لازم ني في ني علشان متزهقيش ممكن خضار عادي من المطبوخ في البيت) لكن ابعدي عن الخضار اللي فية بطاطس او فاصوليا بيضاء لانهم مشبعين نشويات.
7-ثمرة فاكهة يفضل ان تؤكل بعد ساعتين من الغداء و الفاكهة المسموح بها هي:
برتقال – تفاح - يوسفي – بطيخ - جوافة – خوخ – 5 فرولات – 3 مشمش

(لازم تختاري حاجة من كل خطوة من السبعة يعني مثلا غداك النهاردة حيكون:
شرب المشروب الحارق+الماء+ربع فرخة مشوية+5 ملاعق ارز مسلوق+طبق السلطة الكبير+ طبق خضار صغير كوسة+ 1 يوسفي ) بس انت تقدري تاكل دول و ابقي قابليني لو جعت تاني

العشاء:
هام جدا جدا انه يكون قبل النوم بساعتين علي الاقل علشان يلحق يتهضم مايتخزنش في الجسم

1-شرب المشروب السحري الحارق قبل العشاء ب نصف ساعة.
2-شرب 1 او 2 كوب ماء كبير قبل الاكل مباشرة (و ليس بعده او اثناءه ابدا)
3-اختاري واحد مما يلي:
* كوب شاي بلبن + 2 بقسماط (بدون سمسم يكون افضل علشان الدهون اللي في السمسم)
* كوب زبادي + (خيار + طماطم او بدلا منهم ربع رغيف عيش)
* قطعة جبن قريش + (خيار + خس او بدلا منهم ربع رغيف عيش)
*طبق جيلي بدون سكر+ ثمرة فاكهة من المسموحة

(لازم تختاري حاجة من كل خطوة من الثلاثة يعني مثلا عشاك النهاردة حيكون:
شرب المشروب الحارق+الماء+ قطعة جبن قريش + خيار + خس)

لممنوعات اثناء الرجيم:
اللب – السوداني – الترمس – البلح – التين – العنب – المانجو – اي نوع حلويات – اي نوع مياه غزية سواء دايت او عادية

المسموحات اثناء الرجيم:
2 ملعقة سكر موزعة علي اليوم كله (لو مستغنية عانهم يكون افضل)
في حالة الجوع ممن تاكلي:
خيار او خس او طماطم او جزر
او ثمرة فاكهة (برتقال – تفاح - يوسفي – بطيخ – جوافة – خوخ – 5 فرولات – 3 مشمش

لكن خاللي بالك متكليش منهم بين الوجبات بكثرة لاننا عايزين المعدة تاخد علي الحجم الصغير للاكل فيقل حجمها و تبدأي تشعري بالجوع متأخر و بالشبع بسرعة و هو ده هدف الرجيم و هو ده اللي حيساعدك علي تثبيت وزنك بعد كده






التعليقات
6 التعليقات

6 التعليقات:

بصرااحة جميل جدا جدا تسلمي

تسلم أيدك على كل شيء وعجبني جدا التفاصيل بشكل ده

جميل اوي بصراحه بس هو ممكن لأي فصيله تعمله ولا ايه وياريت لو حد جرب يقول نزل اد ايه

إرسال تعليق